Pekin shahrida vatandoshlar ishtirokida futbol o'yini bo'lib o'tdi

Pekin shahrida O'zbekistonda 14-yanvar – Vatan himoyachilari kuni munosabati bilan vatandoshlarimiz ishtirokida o'rtoqlik futbol uchrashuvi tashkil etildi.

O'zbekistonning Pekindagi Elchixonasi tomonidan tashkil etilgan sport tadbiri madhiyamiz sadolari ostida boshlandi. Unda Xitoy oliy o'quv yurtlarida tahsil olayotgan o'zbekistonlik talabalar, shuningdek, vaqtinchalik mehnat faoliyatini amalga oshirayotgan vatandoshlar ishtirok etishdi. Do'stona ruhda o'tgan musobaqa yakunida g'oliblarga sovg'alar topshirildi, barcha ishtirokchilar uchun o'zbek milliy taomlaridan iborat bayram dasturxoni tortildi.

"Dunyo" AA muxbiri o'yinning ayrim ishtirokchilari bilan suhbatlashdi.

Doniyor Ziyodullayev, Shimoliy Xitoy texnologiya universiteti talabasi:

- Bugungi o'yin Vatan himoyachilari kuniga bag'ishlangan bo'lib, unda ishtirok etib, Vatanimizga bo'lgan mehr-muhabbatimizni namoyon etishdan xursand bo'ldik. Albatta, bunday uchrashuvlar Vatanidan uzoqda bo'lgan o'zbekistonliklarni jipslashtiradi.

Barcha yurtdoshlarimizni ushbu bayram bilan tabriklayman!

Ulug'bek Berdiyorov, Pekin texnologiyalar universiteti talabasi:

- Men mexanika muhandisligi yo'nalishida ta'lim olayapman. O'zbekistonda ushbu soha mutaxassislariga talab katta bo'lib, u iqtisodiyotimizning drayver yo'nalishlaridan biri hisoblanadi.

Xitoyda turli mutaxassisliklar bo'yicha ta'lim olayotgan biz yoshlar albatta vatanimizning kelajagi uchun o'z hissamizni qo'shishga tayyormiz.

O'zbekistonning Xitoydagi elchixonasi bizni turli tadbirlarga muntazam taklif etib keladi, diplomatlar bizga maslahatlar beradi, qo'llab-quvvatlaydi, uchrashuvlar va bayramlar o'tkazadi.

Bugun ham ana shunday tadbirlardan biri – "Vatan himoyachilari kuni" munosabati bilan tashkil etilmoqda. Do'stlarimiz bilan suhbatda yangiliklarni baham ko'rdik, mamlakatimizda bo'layotgan voqealarni muhokama qildik. Bu yerda, shuningdek, milliy taomlarimiz va kuy-qo'shiqlarimizdan bahramand bo'ldik.

Ushbu bayram bilan vatanimiz himoyachilarini va xalqimizni tabriklayman!