Shimoliy Xitoy texnologiya universiteti O'zbekiston oliy ta'lim muassasalari bilan hamkorlikni rivojlantiradi

Shimoliy Xitoy texnologiya universitetida xalqaro madaniyat festivali bo'lib o'tdi.

Madaniy festivalda Xitoydagi bir qator diplomatik vakolatxonalar, OAV vakillari, professor-o'qituvchilar va ushbu universitetda tahsil olayotgan xorijiy va mahalliy talabalar ishtirok etdi.

Tadbirda universitet prezidenti Chjan Lifen ishtirok etib, oliy ta'lim muassasasi faoliyati va xalqaro hamkorlikni rivojlantirish bo'yicha ishlar haqida ma'lumot berdi.

Anjumanda Xitoydagi elchixonamiz vakillari va ushbu oliygohda tahsil olayotgan vatandosh talabalar tomonidan O'zbekiston madaniyati va turistik salohiyati namoyish etildi. Milliy o'zbek kuy-qo'shiqlari va raqslari ijro etildi. Milliy taomlarimiz tayyorlanib, mehmonlarga ulashildi.

O'zbekiston diplomatlari tadbir ishtirokchilarini mamlakatimizda so'nggi yillarda fan, ta'lim sohalarini rivojlantirish borasida amalga oshirilayotgan islohotlar va mazkur yo'nalishlarda erishilgan ijobiy natijalar bilan batafsil tanishtirdilar.

Universitet rahbari bilan kechgan muloqot chog'ida O'zbekistonning fan va texnologiyaga asoslangan oliy ta'lim muassasalari haqida aytib o'tildi. Kelgusida ta'lim va ilmiy tadqiqotlar sohalarida o'zaro aloqalarni rivojlantirish, talabalar, o'qituvchilar va ilmiy xodimlar o'rtasida almashinuvlarni yanada kengaytirishda ulkan imkoniyatlar borligi ta'kidlandi.

Universitet prezidenti Chjan Lifen o'zbek tomoni bilan ta'lim sohasidagi hamkorlikka katta e'tibor qaratishini ta'kidlagani holda joriy yil yanvar oyida Pekinda birinchi marta bo'lib o'tgan O'zbekiston-Xitoy ta'lim forumida Shimoliy Xitoy texnologiya universiteti rahbariyati faol ishtirok etganini bildirdi.

Mazkur forum doirasida tomonlar o'rtasida erishilgan kelishuvlarga muvofiq 2024-yil sentyabr oyida Shimoliy Xitoy texnologiya universitetida O'zbekistonning 20 dan ziyod universitetlari rektorlari va diplomatlar ishtirokida simpozium o'tkazish to'g'risida kelishib olindi.