Xitoyda Orolbo'yi rivojlanishining ijtimoiy - iqtisodiy va ekologik jihatlari muhokama qilindi

Pekinda "Orol dengizi tubida o'simlik-tuproq-gidrologik jarayonlar va sinergetik boshqaruv" tadqiqot loyihasi hamda "yashil Orol dengizi" innovatsion hamkorlik bo'yicha seminar bo'lib o'tdi, deya xabar beradi "dunyo"AA muxbiri.

Tadbirlar O'zbekiston Respublikasining Xitoydagi elchixonasi, Xitoy Xalq Respublikasi Minekologiya markazi (FECO), Xitoy fanlar Akademiyasining Sinszyan ekologiya va geografiya instituti, Xitoy tabiiy fanlar davlat fondi (NSFC) va BMTning atrof-muhit bo'yicha dasturi fan va texnologiyalar bo'limi (UNEP) ko'magida tashkil etildi.

Tadbirda Xitoy tomoni ekologiya va atrof-muhit vazirligi, suv xo'jaligi vazirligi vakillari, ekologiya sohasiga ixtisoslashgan Xitoy fanlar akademiyasining tuproqshunoslik va suvni tejash ilmiy-tadqiqot instituti, geografiya fanlari va Xitoy fanlar akademiyasi resurslari instituti, Xitoy o'rmon xo'jaligi akademiyasi, SHHT kotibiyati kabi yetakchi institutlari rahbarlari ishtirok etdilar.

O'zbekiston tomoni investitsiyalar va tashqi savdo vazirligi, innovatsion rivojlanish vazirligi, Ekologiya va atrof-muhitni muhofaza qilish davlat qo'mitasi hamda O'zbekiston Respublikasi Prezidenti huzuridagi Orolbo'yi xalqaro innovatsion markazi rahbariyati tomonidan taqdim etildi.

Seminar davomida Orolbo'yi mintaqasida yuzaga kelgan ijtimoiy-iqtisodiy va ekologik vaziyat ko'rib chiqildi. Orol dengizi mintaqasidagi ekologik va ijtimoiy-iqtisodiy vaziyatni yaxshilashga qaratilgan dastur va loyihalarni amalga oshirish bo'yicha amaliy harakatlarni amalga oshirish uchun xalqaro hamjamiyat mablag'larini safarbar etish muhimligi qayd etildi.

Tadbir ishtirokchilari Orol fojiasining salbiy oqibatlarini yumshatish maqsadida, jumladan, 2017-2021-yillarda Orolbo'yi mintaqasini rivojlantirish bo'yicha Davlat dasturini amalga oshirish doirasida O'zbekiston tomonidan amalga oshirilayotgan sa'y-harakatlarga yuksak baho berdilar.

O'zbekistonning xalqaro tashabbuslariga, jumladan, Orolbo'yi mintaqasi uchun inson xavfsizligi bo'yicha Ko'psheriklik trast jamg'armasini tashkil etishga, BMT ga Orolbo'yi mintaqasini ekologik innovatsiyalar va texnologiyalar zonasi deb e'lon qilish to'g'risidagi maxsus rezolyutsiyani qabul qilishga alohida e'tibor qaratildi. 

Xitoy tomoni Gansu, ichki Mongoliya, Shintszian-Uyg'ur avtonom rayoni kabi ekologik jihatdan noqulay hududlarda innovatsion loyihalarni amalga oshirish, sho'rlangan tuproqqa moslashtirilgan turli o'simliklardan samarali foydalanish bo'yicha tajriba almashdi.

Uchrashuvda O'zbekiston va Xitoyning cho'llanish, Orol dengizi ekologik boshqaruviga qarshi kurash bo'yicha yetakchi olimlarining kelgusidagi ma'ruzalari va takliflari tinglandi.

Seminar yakunida ekspertlar tomonidan Orolbo'yi hududida qo'shma loyihalarni amalga oshirishga innovatsion yondashuvlarni izlash, sanoat, agrar sektor va kommunal-maishiy sohada energiya, resurs va suvni tejashning zamonaviy texnologiyalaridan foydalanishni kuchaytirish bo'yicha ilmiy tadqiqotlarga asoslangan tavsiyalar bildirildi.