O'zbekistonning savdo-iqtisodiy va investitsiyaviy salohiyati Pekin shahrida taqdim etildi

Mamlakatimizning Xitoydagi elchixonasida O'zbekistonning savdo-iqtisodiy va investitsiyaviy salohiyatiga bag'ishlangan taqdimot tadbiri o'tkazildi.

Unda Xitoyning savdo, sanoat, qishloq xo'jaligi, raqamli texnologiyalar, ta'lim, qurilish va boshqa sohalarda faoliyat olib borayotgan kompaniyalari vakillari ishtirok etdi.

Taqdimot davomida mamlakatimizning iqtisodiy va investitsiyaviy salohiyati, xorijiy investorlar uchun yaratilgan imkoniyatlar, jumladan, erkin iqtisodiy va sanoat zonalari, ulardagi mavjud soliq, bojxona va boshqa turdagi imtiyozlar hamda yangi istiqbolli investitsiyaviy loyihalar haqida so'zlab berildi.

Ishtirokchilar bilan O'zbekistonda biznes yuritish afzalliklari to'g'risida fikr almashildi. Ularni qiziqtirgan barcha savollarga batafsil javob berildi.

Yig'ilganlar e'tiboriga mamlakatimizning savdo-iqtisodiy va investitsiyaviy salohiyatiga doir videoroliklar taqdim etildi.

Xitoy kompaniyalari vakillari o'z chiqishlarida, joriy yil aprel oyida O'zbekistonga borishga tayyorligini ma'lum qildi.

Lyu Chjen, Xalqaro iqtisodiyot va texnologiyalar kengashi Bosh kotibi:

 – Taqdimotda qatnashganimdan mamnunman. So'nggi yillarda mamlakatlarimiz o'rtasidagi aloqalar har tomonlama jadallashmoqda. Shuningdek, O'zbekistonda Xitoy investitsiyalari ishtirokidagi korxonalar soni ortib boryapti. Bugungi tadbirda ishtirok etgan kompaniyalarning maqsadi ham o'zbekistonlik sheriklar bilan birgalikda yurtingizda investitsiyaviy loyihalarni amalga oshirishdir.

Biz mamlakatlarimiz va xalqlarimiz o'rtasidagi do'stona aloqalarni yanada mustahkamlashda kamarbasta bo'lishga tayyormiz.