O'zbekistonning savdo-iqtisodiy, investitsiyaviy va turizm salohiyati Xitoyning Chendu shahrida namoyish qilindi

O'zbekiston va Xitoy o'rtasidagi hamkorlikni yanada kengaytirish maqsadida Sichuan provinsiyasining Chendu shahrida mamlakatimizning savdo-iqtisodiy, investitsiyaviy va turizm salohiyatiga bag'ishlangan forum o'tkazildi, deb xabar bermoqda "Dunyo" AA muxbiri.

Unda 150 dan ortiq qatnashchilar, xususan, vazirlik va idora rahbarlari, savdo-sanoat uyushmalari, ishlab chiqarish va sayyohlik kompaniyalari hamda Sichuan provinsiyasi ishbilarmon doiralari vakillari ishtirok etdi.

Taqdimot davomida "Invest to Uzbekistan" shiori ostida mamlakatimizning iqtisodiy va investitsion salohiyati, xorijiy investorlar uchun yaratilgan imkoniyatlar, jumladan, erkin iqtisodiy va sanoat zonalari, ulardagi mavjud soliq, bojxona va boshqa turdagi imtiyozlar hamda yangi istiqbolli investitsion loyihalar yuzasidan batafsil ma'lumot berildi.

Tadbir davomida yig'ilganlarga mamlakatimizning savdo-iqtisodiy, sarmoyaviy va turizm salohiyatini namoyish etuvchi videoroliklar namoyish etildi.

Uchrashuv yakunida ishtirokchilar bilan O'zbekistonda biznes yuritish afzalliklari to'g'risida fikr almashildi hamda ular tomonidan berilgan takliflar batafsil o'rganildi.